Monday, March 9, 2009

ಕೊಟ್ಟರೆ ಬರುವವರು

ಒಂದೊಮ್ಮೆ ಅಹಮದಾಬಾದ್‌ನ ಇಂಡಿಯನ್ ಇನ್ಸ್‌ಟಿಟ್ಯೂಟ್ ಆಫ್ ಮ್ಯಾನೇಜ್‌ಮೆಂಟ್ ಪದವೀಧರರು ಕ್ಯಾಂಪಸ್ ನೇಮಕಾತಿಗಳಲ್ಲಿ ವರ್ಷಕ್ಕೆ ಒಂದೂವರೆ ಕೋಟಿ ರೂಪಾಯಿಗಳಷ್ಟು ಸಂಬಳದ ಕೆಲಸಗಳನ್ನು ಗಿಟ್ಟಿಸುತ್ತಿದ್ದರು. ಬಹುದೇಶಿಯ ಹಣಕಾಸು ಸಂಸ್ಥೆಗಳು, ಉದ್ಯಮಗಳು ಈ ಪದವೀಧರರನ್ನು ಪಡೆಯಲು ಎಷ್ಟು ಬೇಕಾದರೂ ಕೊಡಲು ತಯಾರಾಗಿದ್ದರು. ಅಹಮದಬಾದ್‌ನ ಈ ಸಂಸ್ಥೆ ಭಾರತದ ಶೈಕ್ಷಣಿಕ ಕ್ಷೇತ್ರದ ಗರಿಮೆಯಾಗಿದೆ. ಆದರೆ ಇಂದು ಆರ್ಥಿಕ ಮುಗ್ಗಟ್ಟಿನ ಕಾರಣ ಕೆಲವೊಂದು ಸಂಸ್ಥೆಗಳು ಇಂತಹ ಪದವೀಧರ ಅಧಿಕಾರಿಗಳನ್ನು ಹೊರಗೆ ಹಾಕಿರಲೂ ಬಹುದು. ಹಾಗಾಗಿ ಕ್ಯಾಂಪಸ್ ನೇಮಕಾತಿಗೆ ಬಂದು ವರ್ಷಕ್ಕೆ ಕೋಟಿಗಟ್ಟಲೇ ಸುರಿದು ಅತ್ಯಮೂಲ್ಯವಾದ ಮಾನವ ಸಂಪನ್ಮೂಲಗಳನ್ನು ತಮ್ಮ ಕಂಪನಿಗಳಿಗೆ ಸೇರಿಸುವ ಕಾರ್ಯಕ್ರಮವನ್ನು ರದ್ದುಗೊಳಿಸಿವೆ. ಹಣಕಾಸು ಸಂಸ್ಥೆಗಳು, ಮಾರ್ಕೆಟಿಂಗ್ ಸಂಸ್ಥೆಗಳು ಬಂದು ಪದವೀಧರರನ್ನು ಕೊಂಡರೂ ಸರಾಸರಿ ಸಂಬಳ ಮಾತ್ರ ಸುಮಾರು ಹನ್ನೆರಡು ಲಕ್ಷಗಳಷ್ಟೇ. ಅತ್ಯಂತ ಅಧಿಕ ಸಂಖ್ಯೆ ಒಂದು ಕೋಟಿಯನ್ನೂ ಮೀರಿದೆ.
ಇದುವರೆಗೆ ಭಾರತದ ಸಾರ್ವಜನಿಕ ಸಂಸ್ಥೆಗಳು ಇಲ್ಲಿನ ಪದವೀಧರರಿಗೆ ತಮ್ಮ ಆಯ್ಕೆಯಲ್ಲಿ ಅತ್ಯಂತ ಕೆಳಗಿನಲ್ಲಿರುತ್ತಿತ್ತು. ಬಹುರಾಷ್ಟ್ರೀಯ ಮತ್ತು ಖಾಸಗಿ ಕಂಪನಿಗಳೇ ಇಲ್ಲಿನ ಪದವೀಧರರನ್ನು ಕೊಂಡು ಮುಗಿಸುತ್ತಿದ್ದುದರಿಂದ ಸಾರ್ವಜನಿಕ ಕ್ಷೇತ್ರದ ಕಂಪೆನಿಗಳಿಗೆ ಯಾವಾಗಲೂ ನಿರಾಶೆಯಾಗುತ್ತಿತ್ತು. ಸರಕಾರದ ನೀತಿಗನುಗುಣವಾಗಿ ಸಾರ್ವಜನಿಕ ಸಂಸ್ಥೆಗಳು ಸಂಬಳ ನೀಡಬೇಕಾಗಿರುವುದರಿಂದ ಅದು ಅಹಮದಾಬಾದ್‌ನ ಈ ಪ್ರತಿಷ್ಟಿತ ಸಂಸ್ಥೆಯ ಪದವೀಧರರಿಗೆ ಆಕರ್ಷಕ ವಾಗುತ್ತಿರಲಿಲ್ಲ.
ಈ ವರ್ಷದ ಕ್ಯಾಂಪಸ್ ನೇಮಕಾತಿಯಲ್ಲಿ ಸಾರ್ವಜನಿಕ ಕ್ಷೇತ್ರದ ಬ್ಯಾಂಕ್‌ಗಳಾದ ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ ಮತ್ತು ಬ್ಯಾಂಕ್ ಆಫ್ ಬರೋಡಾ ಕ್ರಮವಾಗಿ ೧೮ ಮತ್ತು ಆರು ಪದವೀಧರನ್ನು ಸೆಳೆದಿವೆ. ಅದೇ ರೀತಿ ಭಾರತದ ಅತೀ ದೊಡ್ಡ ವಾಣಿಜ್ಯ ಸಂಸ್ಥೆಯಾಗಿರುವ ಸಾರ್ವಜನಿಕ ಕ್ಷೇತ್ರದ ಇಂಡಿಯನ್ ಆಯಲ್ ಕಾರ್ಪೋರೇಶನ್ ಐದು ಪದವೀಧರರನ್ನು ಪಡೆಯುವಲ್ಲಿ ಯಶಸ್ವೀಯಾಗಿದೆ. ಸಾರ್ವಜನಿಕ ಕ್ಷೇತ್ರದ ಈ ಕಂಪನಿಗಳು ಹೊಸ ಪದವೀಧರರಿಗೆ ಅವರು ಯಾವುದೇ ಶೈಕ್ಷಣಿಕ ಸಂಸ್ಥೆಯಿಂದ ಬಂದರೂ ಏಕರೀತಿಯ ಸಂಬಳ ಸೌಲಭ್ಯಗಳನ್ನು ನೀಡಬೇಕಾಗುತ್ತದೆ. ಮುಂಚೂಣಿಯಲ್ಲಿರುವ ಸಂಸ್ಥೆಗಳಲ್ಲಿ ವೃತ್ತಿ ನಿಪುಣತೆ ಮತ್ತು ಸಾಂಸ್ಥಿಕ ಸಂಸ್ಕೃತಿಗಳು ಉತ್ತಮವಾಗಿದ್ದರೂ ಕೈಗೆ ಸಿಗುವ ಸಂಬಳ ಸೀಮಿತವಾಗಿರುತ್ತದೆ. ಆದರೆ ಕೆಲವು ಖಾಸಗಿ ಕಂಪನಿಗಳಷ್ಟೂ ನಿಕೃಷ್ಟವಾಗಿರುವುದಿಲ್ಲ ಎಂಬುದಕ್ಕೆ ನಿದರ್ಶನವಾಗಿ ಅಹಮದಾಬಾದ್‌ನ ಇಂಡಿಯನ್ ಇನ್ಸ್‌ಟಿಟ್ಯೂಟ್ ಆಫ್ ಮ್ಯಾನೇಜ್‌ಮೆಂಟ್‌ನ ಸುಮಾರು ಹತ್ತು ಪ್ರತಿಶತಕ್ಕಿಂತಲೂ ಹೆಚ್ಚು ಪದವೀಧರರು ಸಾರ್ವಜನಿಕ ಕ್ಷೇತ್ರದ ಸಂಸ್ಥೆಗಳನ್ನು ಆಯ್ದು ಕೊಂಡಿದ್ದಾರೆ.
ಹತ್ತು ವರ್ಷಕ್ಕೊಮ್ಮೆ ಉಂಟಾಗುವ ಆರ್ಥಿಕ ಸಂಕಷ್ಟದ ಚಕ್ರದಡಿ ಉರುಳಿದ ಅನೇಕ ಆರ್ಥಿಕ ನಿರ್ಧಾರಗಳು ಆರ್ಥಿಕ ಪರಿಸ್ಥಿತಿ ಉನ್ನತಮಟ್ಟದಲ್ಲಿರುವಾಗ ಮರೆತು ಬಿಡುತ್ತವೆ. ಹೀಗೆಯೇ, ಈ ಎಲ್ಲ ಪದವೀಧರರು ಮುಂದೆ ಆರ್ಥಿಕ ಪರಿಸ್ಥಿತಿ ಉತ್ತಮವಾಗುವಾಗ ಬೇರೆ ಹೆಚ್ಚು ಸಂಬಳ ಸಿಗುವ ಕಂಪನಿಗಳನ್ನು ಸೇರಿ ಬಿಡಲಾರರು ಎಂಬ ನಿಶ್ಚಿತತೆಯೇನೂ ಇಲ್ಲ.

4 comments:

  1. ಈ ಅರ್ಥವ್ಯವಸ್ಥೆಯೇ ನನಗೆ ಅರ್ಥವಾಗುವದಿಲ್ಲ!

    ReplyDelete
  2. ಇದೊಂತರಾ ಸೈಕಲಿನಂತೆ ಮೇಲಿದ್ದದ್ದು ಕೆಳಕ್ಕೆ ಬರುತ್ತೆ, ಕೆಳಗಿರೋದು ಮೇಲಕ್ಕೆ!

    ReplyDelete
  3. 2009 will be a very crucial year for world econony. The growth was abnormal and has to come down. Japan has faced 'bubble economy'and now maintaining 2.8% growth. If India maintains 6% growth, it is enough. People who invested money in share markets are the loosers, but think about 'slum dogs'and 'white tigers'

    ReplyDelete